Menu

Waworuntu: Palakat Natal & Taong Baru 2020

  Dibaca : 75 kali
Waworuntu: Palakat Natal & Taong Baru 2020
Waworuntu: Palakat Natal & Taong Baru 2020

indoBRITA, Kumelembuai – Syaloom… Aruy Wo’ Elur Cita Imbaya…Natal deng Taong Baru 2020 so dekat, orang bilang “so di simpangan Kumelembuai kata, so ja maso di kampung”… Lantaran itu Pemerintah mo kase “Palakat”, mo kase Inga pa masyarakat, lebe khusus for om-om, tanta-tanta deng anak-anak muda di Kecamatan Kumelembuai, manjo torang maknai bae” :

Mari jo torang rayakan Natal Taong Baru deng “sederhana”, nda usah mo foya-foya, mo baku lawang gengsi dengan barang-barang baru, rupa baju baru, oto ato motor baru, HP ato elektronik baru, sampe tu kukis di Toples kong riki beking banya-banya, kong nda dapa se abis, so itu brenti jo tu budaya “Pesta Pora”, tu budaya ‘Baku Pamer”, orang bilang “samua di dunia ini cuma Titipan Tuhan”, tagal itu nda usah sampe mo ba pinjam sana-sini, ba paksa ba kredit, ba pinjam pa rentenir, sampe tare somo gade tu kepunyaan, apaley sampe ba bon cuma mo pake bagaya deng ba ambor for Natal….Lebe bae torang siapkan tu Hati beking baru deng kedamaian, kase banya tu kalakuan bagus, kalo perlu tu baju-baju masih boleh pake se persen jo kasana pa sodara yang mo perlu..Torang ley kasiang so musti lebe prihatin ja lia orang laeng pe susah, enter mo makan stengah mati, lebe bae so batabung for anak mo skolah, for kase di Gereja, jang sampe klar Natal Taong baru kong torang iko mata, Taong Baru Kong Utang Baru cuma beking malo, Tuhan nda tuntut Torang mo rayakan Natal deng cara itu….

Brenti jo bagate, brenti jo Mabo-mabo, sama deng Bapak Kapolsek ja bilang…Kalo so talebe, somo rese, somo gampang baku salah, somo gampang bakalae, depe laste maso di ruangan prodeo 1×1 alias panjara..Mari torang malo pa bini di rumah, tuh orang tua ja malo kasana pa anak-anak ja lia, jangan sampe dorang tiru tuh kalakuan mabo-mabo, bagitu ley tu anak muda jang beking malo pa orang tua, kage kurang mo punggu di got, memang kwa malo skali…

Baca juga:  Bupati Sitaro Resmikan Program Pamsimas di Tiga Kampung

Brenti jo kasiang tu hobi “bakarlota” orang pe besae, baku kase jatung, baku cungkel, baku obral orang pe urusan, nda ada manusia sempurna, mari jo torang baku-baku bae, baku-baku sayang..Pendeta ja kase inga Natal itu for bawa kedamaian, so itu baku minta maaf jo kalo so baku salah, nda ada depe rugi kalo torang piara deng beking kuat itu hubungan persaudaraan, jangan cuma jago ba khotbah deng ba mutiara di medsos kong tre masih baku binci deng baku dendam, lebe bae bakudapa kong baku bae..lebe bae nda ada doi mar baku-baku bae, daripada banya doi tare kong banya nda senang…Inga Tuhan Yesus so dekat…

Mari jo torang kase bersih itu Rumah, Kintal deng got, momaras kasana tu rumpu kalo rimbun, brenti jo buang sampa sambarang apaley sampa plastik…So itu beking kasana tu tampa sampah, taruh di blakang ato sei rumah, bakar bae-bae, kong awasi, jang cari gampang, kong ja buang di kobong deng kuala, apaley so musim ujang bagini, jang sampe ta prop tu got kong Aer maso di kintal deng so ja iko di jalan.. pe gagah skali kalo trima tamu kong bersih tu rumah deng kintal, biar ley banya tu toples kukis deng, biar ley fasung tuh pohon trang da prong, mar kalo tu rumah bobou deng caparuni cuma beking malo mo trima orang pasiar…

Ja taruh kira sana kalo ada orang luar apaley tong nyanda kanal ja pasiar di Kampung, tanya kasana depe identitas, kong suruh balapor pa Kumtua ato Pala, dari oras skarang banya modus panipuan, hipnotis, potas, pancuri anak, sampe teroris. Torang musti lebe waspada, supaya Natal aman-aman dan tentram, jang sampe torang kecolongan, cuma komang Torang musti ramah pa orang deng tamu, jangan ja dola-dola orang sambarang, apaley ba kasar, beking dorang pastiu deng tersinggung…

Baca juga:  Polres Minsel Gelar Rapat Anev Mingguan Ops Lilin Pengamanan Natal 2019

For anak kacili, so nembole kasiang main petasan, cuma boleh kembang api, sama deng aer mancur deng bunga api, itu ley musti orang besar ja lia-lia akang..inga mama deng papa tanggung jawab musti tanggung jawab kalo jadi apa-apa…Lebe bagus ley kalo nyanda beli petas-petas, cuma bakar-bakar doi itu, lebe bae so batabung kong beli buku pelajaran, ato beli baju ato capatu baru for mo pake pigi skolah abis libur..

For Kumtua-kumtua, mari jo ajak masyarakat ba bersih di kubur, di poros jalan kampung, lorong, pila-pila jalang deng kuala, priksa tu jaringan aer bersih, jang sampe ta prop ato bocor, se bagus kasiang tuh kampung, biarley so banya tu infrasturktur da bangun, mar lebe bagus ley kalo tu kampung bersih deng indah, banya orang mo datang pasiar, pasti dorang puji pa Kumtua deng Masyarakat.. so boleh se jadwal jo, kong pangge samua ba mapalus, jang somo sibuk samua dgn urusan masing-masing, kong talupa se bersih tu kampung halaman…

Ba hemat kasiang kalo ja pake aer bersih, jang sampe ta buang-buang parcuma, lia kasana kalo blum ada stop kran, pi pasang kasana, baku mangarti deng birman, jang sampe tu laeng stenga mati cari aer, kong torang cuma mo pake sandiri, bagitu ley tu ja pake storm, ba hemat kasana, “listrik so pintar” torang ley musti lebe pintar pake listrik, jang foya-foya, kalo so siang se mati tu lampu,’’ kata Camat Kumelembuai Michael Kamang Waworuntu, SSTP. (*/ape)

Editor:
KOMENTAR

Komentar

Jadilah orang pertama yang memberikan komentar!

Theme Wordpress Untuk Portal berita Professional